निसीखोला। बागलुङको निसीखोला गाउँपालिका अन्तर्गत रहेका शिक्षकहरुका लागि २ दिने अन्तराष्ट्रिय शिक्षक तालिम सुरु भएको छ । निसिखोला गाउँपालिका र कर्म फ्लाइट्स फाउण्डेशनको संयुक्त आयोजना एवं नेदरल्याण्ड स्थित केपिजेड विश्व विद्यालय र थिओला फाउन्डेसन सँगको सहकार्यमा बुधबारबाट जुग्जाखोलामा उक्त तालिम सुरु भएको हो । तालिमबाट शिक्षकहरुलाई आफ्ना विद्यार्थीको सिकाइ अभिरुची र क्षमता पहिचान गरि उनीहरुको आँखामा देखिने जिज्ञासा र खुसीको चम्किलोपनको पहिचान गर्नुका साथै विद्यार्थीको विकासका लागि सहयोगी वातावरण सुनिश्चित गर्ने कुँवरको भनाई छ । पालिका भर रहेका ४५ वटै बिद्यालयका शिक्षकहरुको सहभागिता रहेको उक्त तालिमको बुधबार प्रमुख अतिथि निसिखोला गाउँपालिकाका उपाध्यक्ष प्रेम बहादुर घर्ति मगरले समुद्घाटन गर्नुभएको हो । कार्यक्रमलाई सम्बोधन गर्दै प्रमुख अतिथि घर्तीले नयाँ ज्ञान र शीप आर्जन गर्न लामो उकाली ओराली पार गरेर तालिममा सहभागी हुन भएका शिक्षकहरुलाई २ दिने तालिमको अवसरलाई भरपुर सदुपयोग गर्दै सिकेका शैक्षणीक बिधि र असल अभ्यासहरु कक्षामा विद्यार्थी सामु पुर्याउन र व्यवहारमा लागु गर्न आग्रह गर्नुभयो । साथै समाजमा भएका कुरीति र कुसंस्कारलाइ चिर्न शिक्षक आफै रोल मोडेल भएर समाज र विद्यालयलाई रचनात्मक रुपले जोड्दै समाज रुपान्तरणमा योगदान दिन आग्रह समेत गर्नुभयो । विशिष्ट अतिथि निसिखोला गाउँपालिकाका निमित्त प्रमुख प्रशासकीय अधिकृत दिलिपकुमार चन्दले शिक्षा र स्वास्थ्यको क्षेत्रमा कर्मफ्लाइट्सले गरेको साझेदारीकोको प्रशंसा गर्दै नेदरल्याण्ड र नेपालको मौलिक शिक्षण पद्दतिलाई समायोजन गरेर विविधतापूणर् कक्षाका फरक फरक सिकारुलाइ सहज रुपमा सिकाउन सक्ने क्षमताको बिकास गर्न र सिकेका कुराहरुलाइ कक्षामा पुर्याई समग्र शिक्षाको रुपान्तरणको लागि प्रयास गर्न आग्रह गर्नुभयो । निसीखोला गाउँपालिका युवा, खेलकुद तथा शिक्षा शाखा प्रमुख बिष्णु प्रसाद न्यौपानेले संचालन गरेको कार्यक्रममा सामाजिक बिकास समिति संयोजक चन्द्रसिंह रामजालीको अध्यक्षता रहेको थियो । तालिम संयोजक प्रेम बहादुर कुँवरले तालिमको बारेमा प्रकाश पार्नुभएको थियो भने नेपाल र नेदरल्याण्ड दुवै देशको राष्ट्रिय गान गाइएको थियो ।